ကုမ္ပဏီအကြောင်း – Point Sunseed

ကုမ္ပဏီအကြောင်း

ပွိုင့်မိသားစုနေကြာစေ့လုပ်ငန်းကို ၁၉၈၈ ခုနှစ်တွင် မန္တလေးတိုင်းဒေသကြီး၊ ပြင်ဦးလွင်မြို့တွင် စတင်တည်ထောင်ခဲ့ပြီး မိဘပြည်သူများအတွက် သန့်ရှင်းလတ်ဆတ်သော၊ အနံ့အရသာနှင့်ပြည့်စုံသော နေကြာစေ့လှော်များ ဖြန့်ချိပေးနိုင်ရန် စေတနာထားလုပ်ဆောင်ခဲ့ပါသည်။ ပွိုင့်မိသားစုသည် နေကြာစေ့ဟုဆိုရာတွင် နာမည်ကြီးလှသောနေရာများဖြစ်သည့် ပြင်ဦးလွင်၊ မွန်ဂို၊ မဲဇာနှင့် တောင်ကြီး အစရှိသည့် မြို့ကြီးများမှ အရည်အသွေးပြည့်မီသော၊ Quality အကောင်းဆုံးသော နေကြာစေ့များကိုသာ စံထားရွေးချယ်ပြီးထုတ်လုပ်ကြပါသည်။ အရည်အသွေးသည်သာ ပွိုင့်မိသားစု၏ အဓိကနံပါတ်တစ်ဖြစ်သည်နှင့်အညီ သတ်မှတ်ထားသည့် အရည်အသွေးပြည့်ဝသော ကုန်ကြမ်းနေကြာစေ့များရရှိရန် လွန်စွာခက်ခဲခဲ့ပါသည်။ သို့ပါသော်လည်း ပွိုင့်မိသားစုမှ ရရာနေကြာစေ့ကို အသုံးမပြုဘဲ သွားရောက်ရန်ခက်ခဲသည့်နေရာများသို့ပင် ခက်ခက်ခဲခဲသွားရောက်ရှာဖွေပြီး အရည်အသွေးကောင်းသောနေကြာစေ့များကို တစိုက်မတ်မတ်ရှာဖွေခဲ့ပါသည်။ ပွိုင့်မိသားစုနေကြာစေ့လုပ်ငန်းကြီးမှ မယိမ်းမယိုင် ခိုင်မာသောစိတ်ဓာတ်ဖြင့် “ပွိုင့်အစဉ်ရည်မှန်း အရည်အသွေးထိပ်တန်း” ဟူသော ဂုဏ်ပုဒ်ကို အောင်အောင်မြင်မြင် ထိန်းသိမ်းနိုင်ခဲ့ပါသည်။ တွေ့ကြုံလာသည့် အခက်အခဲများကို ရင်ဆိုင်ရန်အတွက် မဖြစ်ဖြစ်အောင်လုပ်ဆောင်မည်၊ အကောင်းဆုံးကိုသာလုပ်ဆောင်မည်ဆိုသော ခိုင်မြဲသည့်စိတ်ဓာတ်ခွန်အားသည် ပွိုင့်မိသားစုအတွက် အဓိကတွန်းအားဖြစ်ခဲ့ပါသည်။

အနံ့အရသာနှင့် ပြည့်စုံလှသော နေကြာစေ့လှော်ကို ထုတ်လုပ်နိုင်ရန်အတွက် နည်းလမ်းပေါင်းများစွာ စမ်းသပ်လုပ်ဆောင်ပြီးသည့်နောက် နည်းလမ်းကောင်းတစ်ခုကို ကိုယ်ပိုင်နည်း ကိုယ်ပိုင်ဟန်ဖြင့် တီထွင်နိုင်ခဲ့ပါသည်။ အနံ့အရသာနှင့် ပြည့်စုံလှသည့်အတွက် မြန်မာလူမျိုးတို့၏အသဲစွဲဖြစ်နေသော ထမနဲ၏ အနံ့အရသာကောင်းမွန်လှပုံကို ပုံနမူနာယူရင်း ဂျင်း၊ ကြက်သွန်ဖြူအစရှိသည်ဖြင့် ပွိုင့်နေကြာစေ့ကို အကောင်းဆုံးသော အရသာပေးစွမ်းနိုင်အောင် ဖော်စပ်ခဲ့ပါသည်။ ဈာန်အမှတ်တံဆိပ်နေကြာစေ့လှော်ကို ပွိုင့်မိသားစုမှ ပထမဆုံး မိဘပြည်သူများထံ မိတ်ဆက်ပေးခဲ့ပြီး ငါးနှစ်အကြာ ၁၉၉၃ ခုနှစ်တွင် အရည်အသွေးစိတ်တိုင်းအကျဆုံး ပွိုင့်အမှတ်တံဆိပ်နေကြာစေ့လှော်ကို ထပ်မံထုတ်လုပ်ဖြန့်ချိခဲ့ပါသည်။ ပွိုင့်မိသားစု၏ စဉ်ဆက်မပြတ်အားထုတ်ကြိုးပမ်းမှု၊ စိတ်စေတနာ အစရှိသည်တို့၏ အကျိုးကျေးဇူးကြောင့် ပြင်ဦးလွင်တွင် စက်ရုံနှစ်ရုံအထိ တိုးချဲ့ထုတ်လုပ်နိုင်ခဲ့ပြီး မိဘပြည်သူများ၏ အားပေးမှုကို ဝမ်းမြောက်ဖွယ်ရာအပြည့်အဝရရှိခဲ့ပါသည်။ မိဘပြည်သူများ၏ ကျေနပ်ပျော်ရွင်မှု၊ အားပေးမှုသည် ပွိုင့်မိသားစု နေကြာစေ့လုပ်ငန်းအတွက် အားအင်သစ်များဖြစ်ပေါ်စေပြီး ပြင်ဦးလွင်အပြင် အခြားမြို့ကြီးများတွင်ပါ အောင်မြင်မှုမှတ်တိုင် စိုက်ထူနိုင်ခဲ့ပါသည်။ ရန်ကုန်နှင့်မန္တလေးမြို့ကြီးများတွင် စက်ရုံများတိုးချဲ့နိုင်ခဲ့ပြီး မြန်မာနိုင်ငံတစ်ဝှမ်းလုံးရှိ စားသုံးသူမိဘပြည်သူများထံသို့ အနံ့အရသာအကောင်းမွန်ဆုံးသော နေကြာစေ့များကို ဖြန့်ချိပေးနေပြီဖြစ်ပါသည်။

Point Good Choice နှင့် Point Love အမှတ်တံဆိပ်များသည် ပွိုင့်မိသားစု၏ လုပ်ငန်းခွဲအမှတ်တံဆိပ်များဖြစ်ပြီး ၂၀၀၃ ခုနှစ်တွင် စတင်ခဲ့ပါသည်။ ပွိုင့်မိသားစုအမှတ်တံဆိပ်တိုင်း၏ နေကြာစေ့လှော်များသည် အရည်အသွေးပိုင်းကို နံပါတ်တစ် ဦးစားပေး လုပ်ကိုင်သည့်အတွက် အရည်အသွေးပိုင်းဆိုင်ရာကို အထူးစိစစ် ကြပ်မတ်လေ့ရှိပါသည်။ ပွိုင့်မိသားစု၏ ကြိုးစားမှုသည် မှတ်တိုင်များစွာ စိုက်ထူနိုင်ခဲ့ပေသည်။ ၂၀၀၅ ခုနှစ်တွင် Point Sun အမှတ်တံဆိပ်ခွဲကို ထုတ်လုပ်နိုင်ခဲ့ပြီး မြန်မာနိုင်ငံတစ်ဝှမ်းလုံးရှိ မိဘပြည်သူများထံ အရောက်ပို့ဆောင်နိုင်ခဲ့ပါပြီ။ ပွိုင့်မိသားစု၏ အရသာထူးမွန်သော နေကြာစေ့လှော်များကို အရသာမျိုးစုံဖြင့် ခံစားနိုင်ရန်ရည်ရွယ်၍ ၂၀၁၃ ခုနှစ်တွင် Point San Pwint အမှတ်တံဆိပ်ကို မိဘပြည်သူများထံ ထပ်မံမိတ်ဆက်ပေးခဲ့ပါကာ မူလပွိုင့်မိသားစုလုပ်ငန်းမှ လုပ်ငန်းခွဲအမှတ်တံဆိပ်များကို ပေါင်းစည်းပြီး Point Sunflower Group Co., Ltd. အဖြစ် ဖွဲ့စည်းတည်ထောင်ခဲ့ပါသည်။

Point Sunflower Group Co., Ltd. သည် မိဘပြည်သူများအား ပိုမိုကောင်းမွန်သော အနံ့အရသာပြည့်စုံသော နေကြာစေ့များကို မျှဝေပေးလိုသည့် စေတနာအရင်းခံကြောင့် ပြင်ဦးလွင်၊ သီပေါ၊ ကျောက်မဲ အစရှိသည့် မြို့ကြီးများတွင် မွန်ဂိုမှ နေကြာမျိုးများကို ၂၀၁၅ ခုနှစ်မှစ၍ ကိုယ်တိုင်စတင်စိုက်ပျိုးပြီး အရည်အသွေးကောင်းအတွက် အထူးဂရုပြုထုတ်လုပ်နေပြီဖြစ်ပါသည်။ Point Sunflower Group Co., Ltd. သည် နှစ်ပေါင်း ၃၀ ကျော်ကြာ မိဘပြည်သူများထံ အရည်အသွေးကောင်းသော၊ လတ်ဆတ်ကြွပ်ရွသောနေကြာစေ့လှော်များကို ဖြန့်ချိလျက်ရှိရာ နောင်နှစ်ပေါင်းများစွာ မိဘပြည်သူများအတွက် ဆက်လက်တည်ရှိလိုသည်မှာ Point Sunflower Group Co., Ltd. ၏စစ်မှန်သောရည်မှန်းချက်ဖြစ်ပါသည်။ သို့ပါသောကြောင့် လွန်ခဲ့သော ဆယ်နှစ်ခန့်မှ မျိုးဆက်သစ်များကို စနစ်တကျပျိုုးထောင်ပေးလျက်ရှိပါသည်။ မျိုးဆက်သစ်များ၏ ကြိုးပမ်းမှုဖြင့် Point Sunflower Group Co., Ltd. မှ နေကြာစေ့လှော်လုပ်ငန်းကြီး အဓွန့်ရှည်စေရန် ရည်ရွယ်ပြီး မြန်မာနိုင်ငံတွင်သာမက အရှေ့တောင်အာရှနိုင်ငံများနှင့် အနောက်နိုင်ငံများသို့ တရားဝင်ဖြန့်ချိသွားဖို့ အမြန်ဆုံးကြိုးပမ်းသွားမည်ဖြစ်ပါသည်။

လုပ်ဆောင်ချက်

သန့်ရှင်းကျန်းမာသော အလုပ်ဝန်းကျင်ကို ဖန်တီးခြင်း။
ပြည်သူ့အကျိုးပြုလုပ်ငန်းများ ပိုမိုဆောင်ရွက်ခြင်း။
အဖွဲ့အစည်းအတွင်းနှင့် အဖွဲ့အစည်းပြင်ပအစရှိသူများနှင့် ယုံကြည်မှုတည်ဆောက်ခြင်း။
Warren Buffet ၏အဖိုးတန်စကား “ရိုးသားခြင်းသည် အလွန်အဖိုးတန်သော လက်ဆောင်ပစ္စည်းဖြစ်သည်။ လိမ်ညာလှည့်ဖြားတတ်သောသူများထံမှ ရစရာမရှိ။” ကို စိတ်နှလုံးအိမ်တွင် အမြဲအမှတ်တရရှိခြင်း။

မျှော်မှန်းချက်

လာမည့်ဆယ်စုနှစ်အတွင်း မြန်မာနိုင်ငံ၏ အကြီးမားဆုံးသော နေကြာစေ့လုပ်ငန်းအဖြစ်တည်ရှိရန်နှင့် ပြင်ပနိုင်ငံအနှံ့အပြားသို့ တင်ပို့နိုင်ရန်။
စားသုံးသူများ၏ ပထမဦးစားပေးထုတ်ကုန်အဖြစ်တည်ရှိရန်။
ယုံကြည်အားထားရသော Supplier ကောင်းများနှင့် ရေရှည်လက်တွဲရန်။